Хөвсгөл аймгийн Соёл, урлаг, аялал жуулчлал, залуучуудын газар, Монголын урчуудын холбооны Хөвсгөл аймаг дахь салбарын хамтарсан Урчуудын эвлэлийн салбарын анхны дарга Э.Ламжавын нэрэмжит “Хөвсгөл арт-2025” шилдэг уран бүтээлийн үзэсгэлэн Хөвсгөл арт галерейд  гарсан билээ. 

Энэ үеэр оны шилдэг бүтээлийн эзнээр Цэцэрлэг сумын дүрслэх урлагийн багш, Монголын урчуудын эвлэлийн гишүүн зураач Хайдавын Алтанхуяг “Хийморь” бүтээлээрээ шалгарлаа.

“Хийморь” бүтээл нь арьсан хөөмлийн аргаар хийсэн.  Аз хийморьтой байхыг  бэлгэдэж морио шүтдэг гэсэн санааг өргөн уудам талдаа эрх дураараа тонгочин янцгаан давхиж буй азаргаар төлөөлүүлэн бүтээлээ хийсэн гэдгийг Х.Алтанхуяг хэлж байлаа.

Тус үзэсгэлэнд хоймор нутгийн  20 орчим уран бүтээлчийн 40 гаран бүтээлийг дэлгэн үзүүлсэн байна.

Б.Тамираа