Хөвсгөл аймгийн Нийтийн номын сангаас “Трампыг бүтээсэн нь” номыг танилцуулж байна
2019-05-29 20:28:47, 678
Алдарт эрэн сурвалжлах сэтгүүлч, зохиолч, эдийн засаг судлаач Дэвид Кей Жонстоны намтар бүтээл болох Трампыг бүтээсэн нь ном 2016 онд АНУ-д худалдаанд гарчээ. Тэрээр анх Трамптай Филадельфи Инкүйрер сэтгүүлийн сурвалжлагч байхдаа танилцсан бөгөөд тэр үеэс л түүний удам угсаа, бизнесийн өсөлт, уруудалт, улс төрийн карьер, удаа дараалсан гэрлэлтийн түүхийг судалж эхэлсэн аж. Жонстон Нью Йоркийн чимээ аниргүй Квийнс дүүргийн гудамжнаас нэгэн хөвүүн хэрхэн тааварлашгүй, олны танил эрхэм болон цоо шинээр гарч ирсэн түүхийг түүний ажил амьдралын урт замналыг бүхэлд нь багтаан хүүрнэн өгүүлжээ. Трамп бол хэвлэл мэдээллийн хэрэгслийн суутан, бизнесмэн, улс төрийн нударга билээ. Гэсэн хэдий ч түүний замнал хууль шүүхийн асуудал, тэмцэл маргаанаар дүүрэн юм. Үл хөдлөх хөрөнгийн салбарт од нь гийсэн гэр бүлийн бизнесээс угшилтай, дампуурахад дэндүү ахадсан түүний бизнесийн эзэнт гүрэн, Трампын эзэмшсэн боловсрол, амжилтын замнал хийгээд ерөнхийлөгчийн суудалд өрсөлдөхөөр хуй салхи шиг орж ирсэн түүний хосгүй ноёрхлын бүрэн зураглалыг “Трампыг бүтээсэн нь” ном танд дэлгэн харуулах болно. Түүнийг биширдэг ч бай, үзэн яддаг ч бай, Вуди Гатри (Трампын эцгийн тухай доромж утгатай дуу бичсэн кантри дуучин), өмгөөлөгч Рой Кон, мафийн толгойлогчид болон “томчууд”, америкийн дундаж саналаа өгөгчид гэх зэрэг нийгмийн олон давхаргын төлөөллүүд Трампын тойрог замд нэгэнтээ орсон бөгөөд түүний нөлөө маш хүчтэй гэдэгт эргэлзэх аргагүй юм. Трампын ярилцлага, санхүүгийн тайлан, шүүх хурлын баримт нотолгоонууд, олон нийтэд хандсан мэдэгдлүүд зэргийг хэдэн арван жилээр цуглуулж, түүнийг нэвт шувт мэддэг болсон сэтгүүлч Дэвид Кэй Жонстон түүний үнэн төрхийг танд илчилж байна. Тус номыг аймгийн Нийтийн номын сангаас амтархан уншаарай.
Б.Туяа 
 


Хөвсгөл аймгийн Нийтийн номын сангаас “Трампыг бүтээсэн нь” номыг танилцуулж байна

Сэтгэгдэл бичих

АНХААРУУЛГА: Уншигчдын бичсэн сэтгэгдэлд khuvsguliinungu.mn хариуцлага хүлээхгүй болно. khuvsguliinungu.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Нийт сэтгэгдэл: 0