Хөвсгөл аймгийн Арбулаг суманд өчигдөр  19 цаг 40 минутад хүчтэй аадар бороо нэг цаг орчим орсон байна.

Аадар борооны улмаас Тарган нуур 5 дугаар багийн  Хүрэн чулуут хороолол, Цагаан чулуут хороололд буюу сумын төвийн дундуур ихээхэн хэмжээний үер бууж 20 орчим айл өрхүүдийн хашаа усанд автаж, 3 гэр, 2 автомашин урссан байна.

Арбулаг сумын Засаг даргаар ахлуулсан 30 хүн, 6 автомашинтай үерийн усанд гэр нь урссан 3 айл өрхийн 14 хүнийг сумын төвийн Ахмадын өргөөний байранд нүүлгэн шилжүүлсэн байна.

Хөвсгөл аймгийн нийт нутгаар өнөөдөр усархаг бороо орох тул үер усны аюулаас урьдчилан сэргийлэхийг аймгийн Онцгой байдлын газраас онцгойлон анхааруулж байна.

Б.Ганаа