Хөвсгөл аймгийн бүх шатны сургалтын байгууллагын 2025-2026 оны хичээлийн жилийн зорилго, зорилтыг тодорхойлох “Багш нарын бага хурал” өнөөдөр эхэллээ.

Бага хурлыг нээж Хөвсгөл аймгийн Засаг дарга Л.Төмөрбаатар мэндчилгээ дэвшүүлэн, орон нутгаас боловсролын салбарт авч хэрэгжүүлж буй зарим арга хэмжээний талаар мэдээлэл өглөө.

Тухайлбал энэ онд боловсролын салбарт 192,8 тэрбум  төгрөгийн төсөвт өртөгтэй 28 төсөл арга хэмжээ хэрэгжиж байгаа бөгөөд 14 сургууль, 6 цэцэрлэг, 6 дотуур байр болон Политехникийн коллежийн барилга баригдаж, ариун цэврийн байгууламжийн төсөл 97 байгууллагад төлөвлөгдөн хэрэгжиж байгааг онцоллоо.

Багшийн хөгжлийг дэмжих цогц арга хэмжээг орчин үеийн шинэчлэл, өөрчлөлттэй уялдуулан хэрэгжүүлнэ.

Мөн үндэсний хэл бичиг, түүх, соёл, уламжлалд суурилсан сургалтын үйл ажиллагааг хэрэгжүүлж, эх оронч хандлагыг төлөвшүүлэхэд онцгойлон анхаарч ажиллана гэдгийг хэллээ.

Тус хуралдаанаар бүсчилсэн хөгжлийн бодлогыг тодорхойлох, сургалтын үйл ажиллагааг тэгш хүртээмжтэй, чанартай зохион байгуулах, шинэчилсэн сургалтын хөтөлбөр хэрэгжүүлэх зөвлөмж, чиглэлийг танилцуулах, сургуулийн орчинд хүүхдийн хөгжил, хамгааллыг сайжруулах бодлого, чиглэл зэргийг хэлэлцэж байна.

Б.Тамираа