Ашиглалтад орсон орон сууцнуудад төрийн албан хаагчдыг хүүгүй зээлээр иргэдийг оруулах ажлыг зохион байгуулах шаардлагатай байгааг Ерөнхийлөгч Х.Баттулга Ерөнхий хяналтын сонсгол зохион байгуулах саналдаа дурджээ.

 

УИХ-ын Байгаль орчин, хүнс, хөдөө аж ахуйн байнгын хорооны хуралдаанаар Ерөнхийлөгч Х.Баттулгын хүсэлтийн дагуу агаарын бохирдлыг бууруулах бодлого шийдвэр, хууль тогтоомжийг хэрэгжүүлэх үүрэгтэй байгууллага, албан тушаалтны үйл ажиллагаанд хяналт тавих, түүнд төлөвлөгдсөн хөрөнгийн зарцуулалт, үр дүнг тодруулах Ерөнхий хяналтын сонсгол зохион байгуулж буй юм.

 

Нийслэлийн агаарын бохирдлыг бууруулахад 2008-2019 онд улсын төсвөөс 170 тэрбум, гадаадын зээл, тусламжаар 104.7 сая доллар зарцуулсан ч үр дүнд хүрээгүй бана. Тухайлбал www.agaar.mn цахим хуудас нээхэд 327 сая төгрөг, хэвлэл мэдээлэлд 197 сая төгрөг, сурталчилгааны зориулалтаар 2.4 тэрбум төгрөг зарцуулжээ. Түүнчлэн 2011-2015 онд зөвхөн “Цэвэр агаар сан”-гийн дотоод зардалд 932 сая төгрөгийг зарцуулсан байна. Үндэсний аудитын газраас “Цэвэр агаар сан”-гийн 2011- 2015 онд хийсэн ажлын тайланд шалгалт хийсэн бөгөөд хууль бус үйл ажиллагаа, гэмт хэргийн шинжтэй үйлдэл илэрснийг Ерөнхийлөгч саналдаа дурдсаныг Ерөнхийлөгчийн Иргэний нийгэм, хүний эрхийн бодлогын зөвлөх Г.Уянга танилцуулав.

 

Мөн Ерөнхийлөгчийн саналд, “Монгол хүний эрүүл, аюулгүй орчинд амьдрах үндсэн эрхийг ноцтой зөрчиж байгаа энэ мэт асуудлуудад онцгой анхаарч, агаарын бохирдлыг бууруулах төслүүдийг хэрэгжүүлэх үед гарсан гэмт хэрэг, зөрчлийн талаарх мэдээллүүдийг шалган, гэм буруутай этгээдүүдэд хариуцлага хүлээлгэх арга хэмжээ авах тухай албан бичгийг Ерөнхий прокурор, Төрийн хууль цаазын тэргүүн зөвлөх М.Энх-Амгаланд хүргүүлсэн. Нийслэлийн иргэд ханиад томуу, хатгалгаанд нэрвэгдэн, нялхас хэвлийдээ эндэж байгаа ийм нөхцлийг онц байдал зарлах нөхцөл гэж миний бие үзэж байна. Яаралтай онц байдал зарлаж төсөв, хөрөнгийг төвлөрүүлэн, бүхий л түвшинд хэрэгжүүлж байгаа төслүүдийн уялдаа холбоог хангах шаардлага байна. Нийслэлийн гэр хороололд 230 мянган өрх байгаагийн 30 мянга нь Налайх, Багануур, Багахангай зэрэг захын дүүргүүдэд байгаа бол агаарын бохирдлын голомтод 200 мянган өрх байна. Нийслэлд ашиглалтад орсон, борлуулагдаагүй 30 мянга гаруй орон сууц бий. Бэлэн байгаа орон сууцнууддаа төрийн албан хаагчдын цалинг барьцаалан хүүгүй зээлээр оруулах ажлыг зохион байгуулах хэрэгтэй. Ингэснээр борлуулалтгүй орон сууц эдийн засгийн эргэлтэд орж, агаарын бохирдол богино хугацаанд 50 хувиар буурах боломж байна. Үүнд ямар ч мөнгө шаардлагагүй, зөвхөн зохион байгуулалт хэрэгтэй. Өнөөдөр бид агаарын бохирдлын талаар байгууллагынхаа танин мэдэхүйн мэдээллийг хуваалцах биш тодорхой шийдэл гаргах шаардлагатай байна” хэмээв. Ерөнхий хяналтын сонсголд БОАЖЯ, БХБЯ, ГХЯ, НЗДТГ-ын удирдлагууд болон холбогдох байгууллагын төлөөлөгчид оролцож байна. 

Ч.Ариунболд