Хөвсгөл аймгийн Мөрөн хотын нийтийн эзэмшлийн талбайд "Ногоон мөрөн 3" төслийн хүрээнд 22500 мод тарьжээ. Мөрөн сумын Орон нутгийн хөгжлийн сангаас 41 сая төгрөгийг мод бут худалдан авах, хар шороо зөөх зэрэгт зарцуулсан байна.
Мөн Хөдөлмөр халамж үйлчилгээний газраас Хөдөлмөр эрхлэлтийн хэлтэст бүртгэлтэй идэвхтэй ажил хайж байгаа 70 иргэнийг 10 өдөр 14 сая төгрөгөөр цалинжуулж нийт 55 сая төгрөгийн өртөгтэйгээр мод тарих ажлыг гүйцэтгэжээ. Нийтийн эзэмшлийн талбайд хайлаас, шар хуайс, шинэс, голт бор, монос зэрэг есөн төрлийн мод тарьсны дотор ихэнх нь хайлаас мод гэнэ.
Мод тарих үеэр мод нийлүүлж байгаа Улаанбаатар хотын Баянцөөгт компанийн найман ажилтан ирж мэргэжил арга зүйн зөвлөгөө өгч хамтран ажиллажээ.