Хөвсгөл аймгийн Анчигасын даваа орчим үйл ажиллагаа явуулдаг Agartha Resort жуулчны бааз Хөвсгөл далайд бохироо цутгаж байна гэх мэдээлэл цахим, олон нийтийн сүлжээгээр нийтэд өчигдөр оройноос эхлэн цацагдаж эхэлсэн.  Мэргэжлийн байгууллагуудын хяналт шалгалтаар далайн ус бохирдоогүй худал мэдээлэл цацагдсаныг тогтоосон байна. Дээрх мэдээллийн дагуу Хөвсгөл аймгийн  Цагдаагийн газрын Хатгал тосгон дахь Цагдаагийн тасгийн Экологийн асуудал хариуцсан байцаагч, цагдаагийн дэслэгч Б.Ганболдоор ахлуулсан Улсын тусгай хамгаалалттай газрын захиргааны мэргэжилтэн, ОБГ-ын Хатгал тосгон дахь Гал унтраах 69 дүгээр ангийн алба хаагч, Хөвсгөл нуур Эгийн голын сав газрын захиргааны усны чанар, экологийн төлбөр тооцох мэргэжилтэн, Хатгал тосгоны цаг уурын усны мэргэжилтэн нарын бүрэлдэхүүнтэй ажлын хэсэг завиар тухайн газарт очиж ажилласан байна. Бохир цутгагдаж байна гэх газар нь Хатгал тосгоны төвөөс ертөнцийн зүгээр зүүн хойд зүгт усан замаар 68 км зайтай далайн зүүн эрэг дагуу байрлах Балчиргант гэх нэртэй газар бөгөөд газар дээр нь шалгалтын ажиллагааг явуулахад далайн ус руу уулын үерийн ус орж байгаа болох нь тогтоогдсон байна.

Цахим сүлжээнд тархсан зураг дээр нуурын эрэгт цагаан өнгийн хоолой байрлуулсан мэт харагдсан зүйлийг шалгахад үерийн ус цутгаж байгаа хэсэгт ясажсан цагаан өнгийн 4 метрийн урттай ёзоор модны хэсэг байсан. Ажлын хэсэг тухайн газрын ус, хөрснөөс зориулалтын 3 төрлийн тусгай багаж ашиглан дээж авч үзэхэд хөрс болон ус ямар нэгэн бохирдолгүй хэвийн гэсэн дүгнэлт гарсан. Мөн далайн ус бохирлогдсон гэх газраас Agartha Resort жуулчны баазын үйл ажиллагаа явуулж байгаа газар хүртэл усан замаар 20 орчим км зайтай байна. Иймд цахим орчинд тарсан мэдээлэл нь "Худал мэдээлэл" болохыг Хөвсгөл аймгийн  Цагдаагийн газраас албан ёсоор мэдээллээ.

Б.Ганаа