Хөвсгөл аймгийн Мэргэжлийн хяналтын газраас Мөрөн суманд үйл ажиллагаа явуулж буй махны үйлдвэрүүдийн удирдлагуудад удаа дараа мэдээлэл зөвлөмж өгч ажиллаж байна. Тус үйлдвэрийн удирдлагуудтай уулзсан 3 дахь удаагийн нийтийн сонсголоор МХГ-ын дарга, Улсын ахлах байцаагч А.Эрдэнэбаатар махны үйлдвэрүүдэд 6 үндсэн шаардлага тавилаа. Үүнд 

1. Малын гэдэс дотрыг хогийн цэгт хаяуулахгүй байх зорилгоор үйлдвэр бүр “Дайвар бүтээгдэхүүний цех”-тэй байх

2. Дотоодын хэрэгцээнд мах нөөцөлж, махны үнийг тогтвортой байлгахын тулд “Зоорьтой байх”

3. Шаардлагатай шинжилгээг хийдэг  “Мал эмнэлэг, ариун цэврийн лабораторитой байх”

4. “Цэвэр бохир усны байгууламжтай байх”

5. “Хог хаягдлын дэвшилтэт технологи нэвтрүүлсэн байх”

6. Худалан авч байгаа малын гарал үүсэл нь тодорхой эзэнтэй, им тамга нь бүртгэгдсэн “Мэдээллийн сантай байх” гэсэн үндсэн 6 шаардлагыг тавилаа.“Махны үйлдвэрүүд төрийн байгууллагаас тавьсан үүрэг даалгаврыг биелүүлж байж үйл ажиллагаагаа эхлэх бөгөөд хэрвээ биелүүлээгүй бол үйл ажиллагааг нь хуулийн хүрээнд зогсоох болно” гэдгийг МХГ-ын дарга, Улсын ахлах байцаагч А.Эрдэнэбаатар анхаарууллаа.

Б.Гантуяа