Хөвсгөл аймгийн Нэгдсэн эмнэлгийн хүүхдийн тасгийн анхны сувилагч О.Цэнд-Аюуш  сангийн нэрэмжит шагналын 2018 оны шилдгүүдийг  шалгаруулж  шагналыг нь түүний хүү УИХ-ын дэд дарга Л.Энх-Амгалан гардуулан өглөө.
Энэ оны шилдэг тусгай мэргэжилтнээр Нэгдсэн эмнэлгийн  ахлах лаборант П.Мөнхцолмон, Галт сумын Эрүүл мэндийн төвийн  эх баригч Ч.Лхагвасүрэн, шилдэг сувилагчаар Их-уул сум дундын эмнэлгийн  ахлах сувилагч Ж.Хишигбаяр, Нэгдсэн эмнэлгийн сувилагч Ж.Баянжаргал, шилдэг мэргэжилтнээр Эрүүл мэндийн газрын ахлах мэргэжилтэн Л.Оюунцэцэг, Нэгдсэн эмнэлгийн  дотрын ерөнхий мэргэжилтэн Д.Энхтайван, шилдэг үйлчилгээний ажилтанаар Эрүүл мэндийн газрын үйлчлэгч Б.Алтантуяа, Галт сумын Эрүүл мэндийн төвийн жолооч Д.Түмэндэмбэрэл, Нэгдсэн эмнэлгийн  угаагч Д.Өлзий нар шалгарч тус бүр 500,000 төгрөг, алд цагаан хадаг, дурсгалын өргөмжлөлөө гардан авлаа.
Шагналыг Хүүхдийн  тасгийн  анхны  сувилагч  О.Цэнд-Аюушын хүү Л.Энх-Амгалан гардуулан өгөхдөө "Ээж маань аймгийн эмнэлгийн Хүүхдийн тасагт 36 жил сувилагч хийсэн. Гурван эгч эмч хэмээх мэргэжил эзэмшсэн болохоор манай гэр бүл эрүүл мэндийн салбараар амьсгалсан айл байжээ. Ээжийнхээ нойр хоолгүй, олон жил зүтгэсэн мэргэжлийг нь хүндэтгэж "О.Цэнд-Аюушийн нэрэмжит" шагналаар аймгийнхаа эрүүл мэндийн салбарын эмч, сувилагч, ажилтнуудыг сүүлийн 7 жил шагнаж байна. Шагналын сан өндөртэй гэхээс илүү ээжийн минь нэрэмжит шагналыг гардан авах нь илүү нэр төрийн хэрэг байдаг гэсэн үгийг сонсох надад сайхан байдаг. Өдгөө энэ шагналыг эрүүл мэндийн салбарт үр бүтээлтэй ажилласан цэвэрлэгч, жолоочоос аваад мэргэжилтэн, асрагч, сувилагч, эмч гээд 60 орчим хүн хүртээд байна" гэдгийг онцолж байлаа.