"Монголын сайхан бичигтэн-2020" улсын 24-р уралдаанд хоймор нутгийн багш, сурагчид 6 ангилалд амжилттай оролцож, улсад тэргүүлсэн. Энэ удаа Мэргэжлийн багш нарын ангилалд Тэргүүн байр эзэлсэн Хөвсгөл аймгийн Мөрөн сумын “Сод эрдэм” ЕБС-ийн Монгол хэл, бичгийн багш Батсуурийн Алимаатай ярилцлаа. Тэрбээр тус уралдаанд 13 дахь жилдээ оролцож энэ удаагийнхад түрүүлсэн бөгөөд “Монгол соёлын алтан ганжир, монгол бичиг минь зүг бүрт түгэн дэлгэрч, ач ивээлээ хайрлах болтугай” гэдгийг онцолж байлаа. 

     -Мэргэжлийн багш нарын ангилалд түрүүлсэнд баяр хүргэе. Энэ уралдаан бол маш олон хүн оролцдог чансаа өндөр уралдаан. Хэд дэх жилдээ оролцож түрүүлэв?          

    -Баярлалаа. Би дунд сургуулийн 8-р ангийн сурагч байхаасаа эхлээд 13 жил оролцож байна. Их сургуулийн эхний 3 жилд оролцоогүй юм байна. Энэ хугацаанд 10-р ангийн сурагч байхдаа түрүүлж, МУИС-д Засгийн газрын 70 хувийн тэтгэлгээр элсэн суралцах эрхийг хүртэж, багш мэргэжлээ эзэмшсэн. Мөн 2018 онд УИХ-ын гишүүн Л.Энх-Амгалангийн нэрэмжит ээлтэй шагналын эзэн болж байсан, 2019 онд мөн мэргэжлийн багш нарын ангилалд гутгаар байрт орж байсан. 2020 онд түрүүллээ.  

   -Энэ уралдаанд сүүлийн жилүүдэд Хөвсгөл аймгаас маш олон багш, сурагч оролцож, хамгийн их амжилтыг үзүүлж байна. Уралдаанд яаж бэлтгэдэг вэ? Таны өөрийн онцлог, арга туршлагаас хуваалцвал?

    -Аливаа уралдаан тэмцээнд оролцоно гэдэг миний хувьд соёл гэж боддог. Тэр дундаа “Монголын сайхан бичигтэн” уралдаан бол маш их туршлага хуримтлуулдаг, өгөөжтэй, далайцтай, шинийг эрэлхийлэгч болгодог.  Тиймдээ ч энэ уралдаанд өөрийгөө, шавь нараа оролцуулахгүй үлдвэл их зүйлээс хоцорчих гээд байгаа юм шиг санагддаг. Энэ уралдаанд оролцож түрүүлж байсан мэргэжлийн багш нарын чадвар үнэхээр гайхалтай, тус бүрийн онцлогтой, миний хувьд үзгээр, хичээнгүй, үсгийн махбодын яг зөв тигээр сайхан бичихийг эрхэмлэдэг, мөн бичвэртээ найруулгын болон зөв бичих дүрмийн алдаа гаргахгүйг чухалчилдаг.  

-Аливаа уралдаан тэмцээнд хамгийн сайн бэлтгэсэн нь л үр дүн гаргадаг. Гэтэл хүүхдүүдийг ангиар нь монгол бичигт дурлуулж, сургаж нэг ижил түвшинд хүргэнэ гэдэг амаргүй шүү дээ?

    -Тийм шүү, амаргүй. Гэхдээ багш хүний эрхэмлэх зүйл бол өөрийн мэддэг, чаддагаа  хүүхдэд өгч, сайн шавьтай байх бөгөөд тийм л амаргүй ажлыг би сонгосон,  Хүүхэд бүр өөр өөрийн гэсэн онцлогтой, гэвч багш өөрийн зааж сургах арга барилдаа тэр олон ертөнцийг ижил талаар нь нэгтгэн нийцүүлэх, өөрөөр хэлбэл ангийн 30 сурагчийн сэтгэл багшийнхаа бүгдийг нь ижилхэн түвшинд сургах гэсэн нэгэн сэтгэлийг мэдэрсэн, ийм л сурах, сургах гэсэн үйлийн барилдлага төгс бүрдсэн цагт ямар ч чадвар, дадал, мэдлэг аяндаа бий болно л гэж боддог. Монгол бичиг бол өөрөө тэр чигээрээ гайхамшиг, тэр гайхамшигтай талыг нь мэдрүүлж чадвал хүүхдүүд бас л өөрсдөө дурлаад ирдэг. Гэхдээ л хүүхэд бүрийн аливааг сонирхох, сурах арга барил өөр өөр шүү дээ, уулын мод урттай богинотой, хүний явдал сайнтай муутай гэдгийг ухаарч, хүүхдүүдээ мэдэрч хичээл заана, шимтүүлнэ гэдэг бол үнэхээр амаргүй.  

    -Сүүлийн үед хүүхэд бүр цахим хэрэглээг илүү сонирхдог болсон. Гэвч өв соёл болсон эх хэлээ үүнээс дээгүүр тавьж сурч, сургаж байгаа багш таны нууцаас хуваалцвал?

    -Цахим хэрэглүүрээс дээгүүр тавигдах зүйл ч тун ховор болсон цаг үед бид амьдраад дадал болчихлоо. Хэдэн жилийн өмнөхийг бодвол үндэсний бичгээ сурах зайлшгүй хэрэгцээ байгааг хүүхэд багачууд төдийгүй насанд хүрэгчид хүртэл ухаараад, сурах гэж мэрийдэг болсон, ийм байхад хүүхдүүд минь хүртэл уншихгүй, бодохгүй байхын аргагүй нөхцөл байдлыг мэдэрдэг болсон гэж ойлгодог. Бараг 2 жил цахим хэрэгслээр дамжуулан хүүхдүүдтэйгээ ажиллаж байна, аль болох л онол дүрэмд баригдалгүй, сонирхолтой байдлаар уншуулж, бичүүлэх гэж төрөл бүрийн аргыг л хэрэглэж байна даа.

                 -Таныг "Титэм" сургуулийн ахмад багш Д. Доржпагма багшийн шавь гэж сонссон?

 -Тийм ээ. Миний багш бол Ардын боловсролын тэргүүний ажилтан, Алтан гадас одонт, "Титэм" сургуулийн ахмад багш Д. Доржпагма гэж улс, аймагтай алдар нэртэй, монгол бичиг, соёлынхоо төлөө хоёргүй сэтгэлээр зүтгэсэн ачтай хүн бий. Багш минь намайг монгол бичигт элэгтэй, онол, арга зүйн зэгсэн суурь мэдлэгтэй болгож, амьдралд хөтөлсөн дөө. Миний бахархал, үлгэр дуурайл минь.