Хөвсгөл аймгийн Улаан-Уул сумын Улаан тайгын улсын тусгай хамгаалалттай газрын хамгаалалтын захиргаа 1.6 сая гаруй га газрыг хамран хамгаалалт, хяналт шалгалт, судалгаа шинжилгээ, аялал жуулчлалын асуудлыг хариуцан ажиллаж байна.Улаан тайгынхан өнгөрсөн 6-7 сард зэрлэг ан амьтны жим зам болон хулгайн анчид явж болзошгүй даваа, замууд дээр 60 гаруй камер тавьж, судалгаа,  мониторинг  хийхээр өнгөрсөн 7 хоногт авахад 78.000 зураг дарагдсан байна.“Тус камерт  ОХУ-ын гурван  судлаач, байгаль хамгаалагч нар, жимс түүж яваа хүүхдүүд болон ан амьтдын зураг дарагджээ.

Харин хулгайн анчдын зураг байхгүй байгаа нь манай иргэд ухамсартай болж байгаан илрэл. Нөгөө талаар хамгаалалт сайн байгааг харуулсан зүйл болжээ. Камеруудаа өвлийн байрлалд зорилгуудыг нь өөрчлөн тавилаа” гэдгийг Улаан тайгын улсын тусгай хамгаалалттай газрын хамгаалалтын захиргааны дарга Ж.Төмөрсүх хэлж байв.

Хөдөлгөөнийг өөрөө мэдэрдэг камерийг 2017 оноос тавьж эхэлсэн бөгөөд камерт зэрлэг ан, амьтдын гүйдэл мөн тусгай хамгаалалттай газарт нэвтрэн орж байгаа хүмүүсийн зөрчил илэрч, байгаль хамгаалагчид тухай бүрийд нь хэлж сануулан иргэдийг тусгай хамгаалалттай бүсээс гаргаж байсан бол энэ жил ямар нэгэн зөрчил илрээгүй гэнэ.Улаан тайгын Улсын тусгай хамгаалалттай газарт 60 гаруй зүйлийн хөхтөн амьтан түүн дотор нэн ховор, ховордсон аргаль, янгир, хандгай, хүдэр, чацуулан зэрэг 20 гаруй  төрлийн амьтан байдаг ажээ.

Б.Гантуяа